Sənan Səfərov, Azərbaycan Kənd Təsərrüfatı Nazirliyinin baş mütəxəssisi:
Biz “Qarabağın bərpası” sərgisində böyük məmnuniyyətlə iştirak edirik - Azərbaycanın işğaldan azad edilmiş bu rayonunda Kənd Təsərrüfatı Nazirliyinin çoxlu layihələri var.
Onlardan biri artıq həyata keçirilməkdədir, bu, Zəngilan rayonundakı Ağalı “Ağıllı kəndi”dir.
Kənd Təsərrüfatı Nazirliyinin planına əsasən, bu ərazidə, 110 hektar sahədə 200 “ekoloji ev”, 360 yerlik məktəb, uşaq bağçası, ekoloji istilik sisteminə malik olan sosial obyektlər, “ağıllı” işıqlandırma sistemi və tullantıların idarə olunması sistemi yaradılır.
Kənd təsərrüfatı məhsullarının emalı və istehsalı prosesi alternativ enerji mənbələri hesabına təmin ediləcək.
“Ağıllı kənd” konsepsiyası bir çox xidmətin elektron formata keçirilməsi və “yaşıl” texnologiyaların və digər innovativ ideyaların tətbiq edilməsi yolu ilə Azərbaycanda aqrar sektorun inkişafının stimullaşdırılmasına xüsusi diqqət yetirilməsini nəzərdə tutur.
Məsələn, Zəngilan rayonunda əkin sahələrinin monitorinqi üçün dronlardan istifadə olunur. Su təchizatı sistemi rəqəmsallaşdırılıb, yeni texnologiyalar vasitəsilə torpağın vəziyyəti öyrənilir və müasir avadanlıqlarla mühüm iqlim göstəricilərinə nəzarət edilir.
30 il əvvəl Ermənistanın təcavüzü nəticəsində Zəngilan rayonunu tərk etmiş azərbaycanlı qaçqınların tezliklə öz doğma yurdlarına qayıtması bizim üçün çox vacibdir.
Hökumət Qarabağın bərpasına xüsusi diqqət yetirir və işğaldan əziyyət çəkən insanları ən yaxşı şəkildə təmin etmək istəyir.
AZ
EN
RU
ZH
