Azərbaycan Respublikasının Prezidenti cənab İlham Əliyevin rəhbərliyi ilə Qarabağ və Şərqi Zəngəzurda həyata keçirilən genişmiqyaslı yenidənqurma və infrastruktur layihələri regionun dayanıqlı inkişafı üçün yeni imkanlar yaradır. Zəngin iqtisadi resursları, təbii ehtiyatları, enerji mənbələri, əlverişli nəqliyyat-tranzit mövqeyi və geniş turizm potensialına malik bu ərazilər yerli və xarici investorlar üçün real imkanlar və uzunmüddətli perspektivlər təqdim edir.  

Azad edilmiş ərazilərdə fəaliyyət göstərən sahibkarlıq subyektlərinin mənfəət, torpaq, əmlak və sadələşdirilmiş vergidən, eləcə də istehsal fəaliyyəti üçün idxal edilən texnologiya, xammal və materialların ƏDV və gömrük rüsumundan azad olunması bölgədə sənaye və biznesin inkişafı üçün stimullaşdırıcı iqtisadi şərait formalaşdırıb. Regionda yaradılan iki sənaye parkında sahibkarlıq fəaliyyətinin həyata keçirilməsi üçün dövlət vəsaiti hesabına hazır infrastrukturun təmin edilməsi, inzibati prosedurların sadələşdirilməsi və tətbiq edilən əlavə güzəştlər sənaye və istehsal ekosistemini gücləndirir. Ağdam Sənaye Parkı qısa müddətdə rezident sayına görə ölkə üzrə ikinci yerə yüksəlib. Burada istehsal olunan məhsullar yerli istehlaka yönəldilməklə yanaşı, ixrac edilir. 

Torpaqlarımızın azad edilərək iqtisadi sistemə reinteqrasiyası regional tərəfdaşlıq üçün geniş imkanlar açır. Ərazilərin sürətlə bərpası, sosial infrastrukturların yenidən qurulması, avtomobil və dəmir yolu xətlərinin salınması, beynəlxalq hava limanlarının istifadəyə verilməsi ərazilərin regional və beynəlxalq nəqliyyat şəbəkəsinə inteqrasiyasını sürətləndirməklə bölgənin iqtisadi potensialını artırır.  

İqtisadi islahatlar və əlverişli hüquqi-institusional mühit Azərbaycanın investisiya cəlbediciliyini daha da artırıb, rəqabətqabiliyyətli insan kapitalının inkişafını sürətləndirib. “Moody’s”, “Fitch Ratings” kimi beynəlxalq reytinq agentliklərinin son hesabatlarında ölkəmizin kredit reytinqi müsbət dəyərləndirilərək yüksəldilib.  

Biznes nümayəndələrini azad edilmiş ərazilərimizdə təqdim edilən geniş imkanlardan və ölkəmizin əlverişli investisiya mühitindən faydalanmağa və işbirliyində fəal olmağa dəvət edirik. İnanırıq ki, “Rebuild Karabakh” sərgisi bölgənin mövcud potensialını nümayiş etdirməklə, yeni tərəfdaşlıqların qurulmasına, Qarabağ və Şərqi Zəngəzurun inkişafının sürətlənməsinə əhəmiyyətli töhfələr verəcək.  

Sərginin reallaşmasında əməyi olan bütün tərəfdaşlara və təşkilatçılara təşəkkür edir, 

iştirakçılara və ziyarətçilərə işlərində müvəffəqiyyətlər arzulayırıq! 

Hörmətlə,  

Mikayıl Cabbarov 

Azərbaycan Respublikasının iqtisadiyyat naziri 

Bakı Şəhər İcra Hakimiyyəti adından “Xəzər İnşaat Həftəsi” çərçivəsində keçirilən 30-cu Yubiley Azərbaycan Beynəlxalq İnşaat “BakuBuild”, 5-ci Yubiley Azərbaycan Beynəlxalq Qarabağın Bərpası, Yenidənqurulması və İnkişafı “Rebuild Karabakh”, 17-ci Beynəlxalq İstilik, Havalandırma və Kondisionerləşdirmə sərgisi “Aquatherm Baku” və 13-cü Xəzər Beynəlxalq Yol İnfrastrukturu və İctimai Nəqliyyat “Road&Traffic” sərgiləri münasibətilə sizi səmimi qəlbdən salamlayır, hər birinizə uğurlar arzulayıram. 

Bu il xüsusilə qeyd olunmalıdır ki, BakuBuild sərgisi 30 illik, Rebuild Karabakh sərgisi isə 5 illik yubileyini qeyd edir. Bu münasibətlə təşkilatçıları, iştirakçıları və tərəfdaşları təbrik edir, bu sərgilərin illər ərzində qazandığı nüfuzu və peşəkar ictimaiyyətin etimadını yüksək dəyərləndirirəm. 

Adıçəkilən sərgilər ölkəmizin iqtisadi inkişafı, beynəlxalq əməkdaşlıqların möhkəmləndirilməsi və yeni texnologiyaların təşviqi baxımından da mühüm əhəmiyyət daşıyır.  

Bu gün Bakı şəhəri regionun ən sürətlə inkişaf edən və innovativ yanaşmaların tətbiq edildiyi şəhərlərindən biridir. Cənab Prezident İlham Əliyevin rəhbərliyi ilə həyata keçirilən genişmiqyaslı layihələr sayəsində paytaxtımız müasir, təhlükəsiz və ekoloji baxımdan dayanıqlı şəhər modelinə çevrilmişdir. 

Paytaxtımız eyni zamanda beynəlxalq tədbirlərin keçirilməsi üçün əlverişli məkandır. İnkişaf etmiş infrastruktur, qonaqpərvər mühit və açıq işgüzar şərait Bakını qlobal əməkdaşlıq üçün nüfuzlu platformaya çevirir. Müxtəlif səviyyəli beynəlxalq sərgilərin, forumların və konfransların mütəmadi keçirilməsi şəhərimizin iqtisadi inkişafına, mədəni və ictimai həyatına əlavə dinamika gətirir.  

“Xəzər İnşaat Həftəsi” kimi tədbirlər şəhərsalma, inşaat və bərpa sahələrində müasir yanaşmaların formalaşmasına, qabaqcıl texnologiyaların tətbiqinə və yeni ideyaların reallaşmasına münbit zəmin yaradır. Eyni zamanda bu sərgilər peşəkar dairələr arasında bilik və təcrübə mübadiləsinə, gələcəyə yönəlmiş əməkdaşlıq imkanlarının yaranmasına şərait yaradır. Bütun iştirakçılara məhsuldar fəaliyyət və yeni uğurlar arzulayıram. 

Eldar Əzizov 

Bakı Şəhər İcra Hakimiyəyyətinin başçısı 

Dəyərli qonaqlar! 

Sizi 5-ci Azərbaycan Beynəlxalq Qarabağın Bərpa, Yenidənqurma və İnkişafı ‒ “Rebuild Karabakh” Sərgisində səmimi qəlbdən salamlamaqdan məmnunluq duyuram. 

Şanlı Zəfərimizin 5-ci ildönümü ərəfəsinə təsadüf edən bu sərgi yalnız adi bir tədbir deyil, eyni zamanda dövlət başçısı Cənab İlham Əliyevin rəhbərliyi ilə işğaldan azad edilmiş ərazilərdə həyata keçirilən sürətli bərpa və yenidənqurma işlərinin bariz göstəricisidir.  

Qarabağ və Şərqi Zəngəzurda aparılan genişmiqyaslı bərpa-tikinti layihələri müasir şəhərsalma prinsipləri əsasında qurulur və burada yüksək həyat keyfiyyəti təmin edilir. Öz doğma yurdlarına qayıdan keçmiş məcburi köçkünlərimizin dayanıqlı və rahat şəkildə məskunlaşması üçün müasir infrastruktur yaradılır, ekoloji tarazlıq, sosial, mədəni və iqtisadi rifah ön planda saxlanılır. Bütün bu proseslər bütövlükdə ölkəmizin gələcək inkişafına töhfə verir və işğaldan azad edilmiş ərazilərimizi yenidən dirçəlmiş, müasir və dayanıqlı bir məkana çevirir.   

Artıq ənənə halını alan bu sərgi Qarabağ və Şərqi Zəngəzurun bərpa, yenidənqurma və inkişafı istiqamətində yerli və beynəlxalq biznes nümayəndələri arasında faydalı təşəbbüslərin və səmərəli əməkdaşlıqların qurulması üçün xüsusi rol oynayır. Bu da öz növbəsində işğaldan azad edilmiş ərazilərimizdə yeni layihələrin reallaşması üçün geniş imkanlar açır.  

Qarabağ və Şərqi Zəngəzurun sürətli və dayanıqlı inkişafına öz töhfəsini verəcək bu sərginin təşkilatçılarına təşəkkürümü bildirir və sərginin işinə uğurlar arzulayıram! 

Hörmətlə,  

Vahid Hacıyev  

Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəsi 

Hörmətli sərgi iştirakçıları! 

Dəyərli qonaqlar! 

Sizi Azərbaycanda payız sərgi mövsümünün mühüm hadisələrindən biri olan “Rebuild Karabakh” – 5-ci Yubiley Azərbaycan Beynəlxalq Qarabağın Bərpası, Yenidənqurulması və İnkişafı Sərgisinin açılışı münasibətilə salamlamaqdan məmnunluq duyuram. 

Qürur hissi ilə qeyd etmək istərdim ki, 5 il öncə məhz - 2020-ci ildə Müzəffər Ali Baş Komandan, cənab Prezident İlham Əliyevin rəhbərliyi ilə Azərbaycan Ordusu 44 gün davam edən Vətən müharibəsində tarixi ədaləti bərpa edərək işğal altında olan torpaqlarımızı azad etmişdir. Bu şanlı Zəfərdən sonra dövlətimiz həmin ərazilərin sürətli bərpası, yenidənqurulması və dayanıqlı inkişafı istiqamətində ardıcıl və məqsədyönlü addımlar atmaqdadır. Bu fəaliyyətlər Kəlbəcərdə də “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində sistemli şəkildə həyata keçirilməkdədir. 

 “Rebuild Karabakh” sərgisi bu xüsusda Qarabağ və Şərqi Zəngəzur bölgələrinin bərpa və inkişaf potensialını geniş müzakirə etmək, o cümlədən bu bölgələrin iqtisadi və investisiya imkanlarını təqdim etmək baxımından olduqca əhəmiyyətli bir platformadır. 

Sözügedən sərgi eyni zamanda beynəlxalq şirkətləri və biznes qurumlarını bu ərazilərin bərpasında fəal iştirak etməyə təşviq edir və  əsas məqsədlərindən biri işğaldan azad olunmuş ərazilərə yönələn sərmayə qoyuluşlarını artırmaq, xarici tərəfdaşların infrastrukturun yenidən qurulması, ictimai obyektlərin tikintisi və digər mühüm layihələrdə iştirakını təmin etməkdir. 

“Rebuild Karabakh” sərgisində təqdim olunan innovativ məhsullar, xidmətlər və texnoloji həllər sənayenin müxtəlif sahələri üzrə əməkdaşlıq imkanlarını genişləndirəcək, yeni tərəfdaşlıqların qurulmasına və qarşılıqlı faydalı müqavilələrin imzalanmasına töhfə verəcəkdir. 

Kəlbəcər rayonunda Azərbaycan Respublikası Prezidentinin xüsusi nümayəndəliyi adından bu əlamətdar tədbirin təşkilində əməyi keçən hər kəsə təşəkkür edir, iştirakçılara uğurlu və məhsuldar fəaliyyət arzulayıram! 

Hörmətlə, 

Bəşir Hacıyev  

Kəlbəcər rayonunda Azərbaycan Respublikası Prezidentinin xüsusi nümayəndəsi    

Azərbaycan Respublikasının Kiçik və Orta Biznesin İnkişafı Agentliyi (KOBİA) adından hər birinizi 5-ci Yubiley Azərbaycan Beynəlxalq Qarabağın Bərpa, Yenidənqurma və İnkişafı Sərgisində (“Rebuild Karabakh”) və 30-cu Yubiley Azərbaycan Beynəlxalq İnşaat Sərgisində (“BakuBuild”) salamlayıram. 

İşğaldan azad edilmiş ərazilərimiz sahibkarlıq fəaliyyəti və investisiya qoyuluşu üçün böyük potensiala malikdir. KOBİA-ya yerli və xarici iş adamlarından daxil olan müraciətlər biznesin Qarabağda həyata keçirilən bərpa və quruculuq işlərində, sahibkarlıq fəaliyyətində və sərmayə qoyuluşunda maraqlı olduğunu göstərir. Təbii ki, bunda işğaldan azad edilmiş ərazilərdə tətbiq edilən müxtəlif güzəştlərin və təşviqlərin rolu az deyil.  

Bu baxımdan, “Rebuild Karabakh” sərgisi Qarabağda aparılan bərpa, yenidənqurma və inkişaf prosesləri, bölgənin ölkə iqtisadiyyatına reinteqrasiyası və bu sahədə dövlət-özəl sektor əməkdaşlığı barədə ətraflı məlumat almağa imkan verən vacib platformalardandır. KOBİA hər il olduğu kimi bu il də KOB-ların “Rebuild Karabakh” sərgisində ödənişsiz olaraq iştirakına dəstək göstərir.  

Fürsətdən istifadə edərək bu nəşrin oxucularının diqqətinə çatdırmaq istəyirik ki, işğaldan azad edilmiş ərazilərdə öz biznesini qurmaq istəyən sahibkarlar və xarici investorlar biznes layihələrini KOBİA-ya təqdim edə bilərlər. Agentlik iş adamlarına işğaldan azad edilmiş ərazilərin iqtisadi və investisiya potensialına dair ətraflı məlumat, peşəkar məsləhət xidməti, müvafiq dövlət qurumları ilə əlaqələndirmə, yerli tərəfdaşların tapılması istiqamətində dəstək və xidmətlər təqdim edir. Şuşa şəhərində Dövlət Xidmətləri Mərkəzində KOB-lara yönəlik xidmətləri həyata keçirən "Şuşa KOB evi”, Zəngilan və Laçında isə KOB dostu ofislərimiz fəaliyyət göstərir. Bu, bölgədə biznesin qurulmasına və inkişafına dəstək məqsədilə KOBİA-nı sahibkarlara daha yaxın edir. Qarabağın iqtisadi potensialının yerli və xarici iş adamlarına təqdim olunması məqsədilə Agentlik tərəfindən müxtəlif tədbirlər, görüşlər çərçivəsində məlumatlandırma işləri də görülür.  

Öz növbəsində “BakuBuild” sərgisi uzun müddətdir ki, tikinti, layihələndirmə və memarlıq sahələrində yeniliklərin təqdim olunduğu platforma kimi öz missiyasını uğurla davam etdirir.  

KOBİA adından sərgilərin işinə uğurlar arzulayır, belə tədbirlərin Qarabağın inkişafına, yeni biznes əməkdaşlıqlarının qurulmasına öz töhfəsini verəcəyinə inanırıq. 

Hörmətlə, 

Orxan Məmmədov 

Azərbaycan Respublikası  

Kiçik və Orta Biznesin İnkişafı Agentliyinin (KOBİA) İdarə Heyətinin sədri 

Dəyərli qonaqlar! 

Hər birinizi “Xəzər İnşaat Həftəsi” çərçivəsində təşkil olunan 5-ci Azərbaycan Beynəlxalq Qarabağın Bərpa, Yenidənqurma və İnkişafı Sərgisinin (“Rebuild Karabakh”) açılış mərasimində səmimi-qəlbdən salamlayıram. 

Bu il yubileyini qeyd edən sərgi Azərbaycanın müasir inkişaf dinamikasında, xüsusilə işğaldan azad olunmuş ərazilərdə həyata keçirilən genişmiqyaslı bərpa və yenidənqurma proseslərində önəmli bir platformaya çevrilib. “Rebuild Karabakh” sərgisi təkcə təqdim olunan məhsul və xidmətlərin nümayişi üçün deyil, eyni zamanda yerli və xarici tərəfdaşlar arasında möhkəm əməkdaşlıq əlaqələrinin qurulması, bilik və təcrübə mübadiləsinin təşviq edilməsi, qabaqcıl texnoloji həllərin təqdim olunması üçün də unikal imkan yaradır. 

Sərgi çərçivəsində təqdim olunan innovativ yanaşmalar, yüksək texnologiyalara əsaslanan məhsullar və müasir layihələr Qarabağın yenidən qurulmasında əhəmiyyətli rol oynamaqla yanaşı, regionun iqtisadi və sosial dirçəlişinə də töhfə verir. Burada iştirak edən şirkət və qurumların fəaliyyəti yalnız infrastruktur və sənaye baxımından deyil, həm də regionun dayanıqlı gələcəyi, ətraf mühitin qorunması, “ağıllı” şəhər konsepsiyalarının tətbiqi və yaşıl texnologiyaların inteqrasiyası baxımından xüsusi əhəmiyyət daşıyır. 

Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi altında ordumuzun qazandığı tarixi Qələbədən sonra başlanılan bərpa və yenidənqurma prosesi dövlətimizin prioritet istiqamətlərindən birinə çevrilib. İşğaldan azad edilmiş torpaqlarda həyata keçirilən sürətli və planlı layihələr Qarabağda tamamilə yeni bir həyatın başlanğıcını qoyur. Əminəm, sərgi qarşılıqlı faydalı əməkdaşlıqların qurulmasına, Qarabağın bərpası ilə bağlı mühüm ideyaların reallaşmasına və ölkəmizin sosial-iqtisadi inkişafına töhfə verəcək. 

Sərginin təşkilində göstərdikləri peşəkar fəaliyyətə görə təşkilatçılara Azərbaycan Respublikasının İxracın və İnvestisiyaların Təşviqi Agentliyi – AZPROMO adından dərin minnətdarlığımı ifadə edir, tədbirin işində uğurlar arzulayıram.  

Hörmətlə, 

Yusif Abdullayev 

AZPROMO-nun icraçı direktoru 

Azərbaycan Respublikasının Mənzil İnşaatı Dövlət Agentliyinin kollektivi adından Sizi salamlayır, 5 illik yubileyini qeyd edən Azərbaycan Beynəlxalq Qarabağın Bərpa, Yenidənqurma və İnkişafı – “Rebuild Karabakh” Sərgisinin açılışı münasibətilə hər birinizi səmimi qəlbdən təbrik edirəm. 

44 günlük Vətən müharibəsində Azərbaycan Respublikasının Silahlı Qüvvələrinin Müzəffər Ali Baş Komandanı İlham Əliyevin rəhbərliyi ilə rəşadətli Ordumuz tərəfindən qazanılan tarixi Qələbədən dərhal sonra işğaldan azad edilən torpaqlarımızda qısa müddətdə sürətli və genişmiqyaslı bərpa-quruculuq işləri aparıldı, keçmiş məcburi köçkünlərin öz dədə-baba yurdlarına “Böyük Qayıdış”ı başladı.  Çoxşaxəli və irimiqyaslı bərpa-quruculuq işlərinin bu gün də sürətlə davam etdirildiyi Qarabağ artıq nəhəng layihələrin reallaşdırıldığı möhtəşəm diyara çevrilib. Eyni zamanda soydaşlarımızın burada rahat yaşayışının təmin olunması üçün də bütün zəruri işlər görülməkdə davam edir. Möhtərəm Prezidentimiz cənab İlham Əliyev daim çıxışlarında bildirir ki, Qarabağ və Şərqi Zəngəzur bölgələri nəinki Azərbaycanın, Qafqazın, dünyanın ən gözəl yerlərindən biri olacaq.  

Ölkə başçısının tapşırıqlarına uyğun olaraq Mənzil İnşaatı Dövlət Agentliyi də öz növbəsində işğaldan azad edilmiş ərazilərimizin bərpasında, yenidən qurulmasında iştirak edir. Agentlik tərəfindən Füzuli və Cəbrayıl rayonlarında yaşayış kompleksləri inşa olunub, Xocalıda yaşayış binalarının əsaslı təmiri və yenidən qurulması, eləcə də ərazinin abadlaşdırılması işi həyata keçirilib. 

Mənzil İnşaatı Dövlət Agentliyi “Rebuild Karabakh” sərgisi təsis olunduğu ilk gündən onu dəstəkləyir, artıq 5-ci ildir ki, ardıcıl olaraq sərgidə öz stendi ilə iştirak edərək layihələrini ziyarətçilərə təqdim edir. İnanıram ki, müxtəlif sahələr üzrə sərgidə iştirak edən yerli və xarici şirkətlər Qarabağın bundan sonrakı inkişafına, çiçəklənməsinə öz töhfəsini verəcək. 

Bir daha bütün sərgi iştirakçılarına və ziyarətçilərə öz minnətdarlığımı bildirir, Qarabağın bərpası və tərəqqisi naminə səmərəli əməkdaşlığın qurulmasında uğurlar arzulayıram. 

 Sadıq Sadıqov  

Azərbaycan Respublikasinın Mənzil İnşaatı Dövlət Agentliyinin İdarə Heyətinin sədri 

Sizi Azərbaycan Respublikası Sahibkarlar (İşəgötürənlər) Təşkilatları Milli Konfederasiyası adından 30-cu Yubiley Azərbaycan Beynəlxalq İnşaat – “BakuBuild” və 5-ci Yubiley Azərbaycan Beynəlxalq Qarabağın Bərpa, Yenidənqurma və İnkişafı – “Rebuild Karabakh” sərgilərində ürəkdən salamlayıram. 

Azərbaycan Respublikası Prezidentinin rəhbərliyi ilə həyata keçirilən dərin iqtisadi islahatlar, sahibkarlığın inkişafına yönəlmiş sistemli təşəbbüslər ölkəmizin hərtərəfli yüksəlişinə töhfə verir. Son illər ərzində Azərbaycan iqtisadiyyatı müsbət artım nümayiş etdirir, 2024-cü ildə ölkədə 126,3 milyard manatlıq və ya əvvəlki illə müqayisədə 4,1 faiz çox ümumi daxili məhsul istehsal olunub. İqtisadiyyatın neft-qaz sektorunda əlavə dəyər 0,3 faiz, qeyri neft-qaz sektorunda isə 6,2 faiz artıb.Bu, dövlətin və özəl sektorun birgə fəaliyyətinin real nəticəsidir. 

İşğaldan azad olunmuş ərazilərə Böyük Qayıdış Proqramı artıq praktik müstəvidə həyata keçirilir. Yalnız son iki il ərzində Qarabağ və Şərqi Zəngəzur iqtisadi rayonlarında yüzlərlə infrastruktur layihələri, o cümlədən hava limanları, avtomobil yolları, dəmir yolları və enerji mərkəzləri istifadəyə verilib. Əhalinin məşğulluğu və sahibkarlıq fəaliyyəti üçün münbit şərait yaradılır, on minlərlə yeni iş yerlərinin açılması planlaşdırılır. 

Qarabağın “yaşıl zona” elan olunması, alternativ və bərpa olunan enerji mənbələrinin tətbiqi ilə bağlı layihələr Azərbaycanın yaşıl enerji ixracatçısı olacağına dair inamı daha da möhkəmləndirir. Bu gün artıq beynəlxalq investorların 2 milyard dollardan çox investisiya paketi “yaşıl enerji” layihələrinə yönəldilib. 

Əziz dostlar, “BakuBuild” və “Rebuild Karabakh” sərgiləri sadəcə biznes platforması deyil, həm də Qarabağın bərpası uğrunda birgə həmrəyliyin, əməkdaşlığın və gələcəyə inamın simvoludur.  

Azərbaycan Sahibkarlar Konfederasiyası olaraq, biz Qarabağın bərpası, sahibkarlığın inkişafı və ölkəmizin iqtisadi qüdrətinin artırılması naminə bütün səyləri dəstəkləməyə hazırıq. 

Sərginin keçirilməsi münasibətilə hər birinizi ürəkdən təbrik edir, uğurlu biznes görüşləri, səmərəli əməkdaşlıqlar və yeni nailiyyətlər arzulayıram. 

Hörmətlə, 
Məmməd Musayev 
Azərbaycan Respublikası Sahibkarlar (İşəgötürənlər) 
Təşkilatları Milli Konfederasiyasının Prezidenti 

Sizi 5-ci Yubiley Azərbaycan Beynəlxalq Qarabağın Bərpa, Yenidənqurma və İnkişafı Sərgisində Qarabağ Dirçəliş Fondu adından salamlayıram. 

2020-ci ildə Müzəffər Ali Baş Komandan, Prezident cənab İlham Əliyevin rəhbərliyi ilə Vətən müharibəsində qazanılmış tarixi Qələbədən sonra ölkəmiz üçün strateji əhəmiyyətə malik bərpa və yenidənqurma mərhələsi başlamışdır. Bu mərhələ təkcə fiziki infrastrukturu deyil, həm də sosial, iqtisadi və mədəni həyatın canlandırılmasını, eyni zamanda azad edilmiş torpaqlarda yeni inkişaf modelinin qurulmasını hədəfləyir və bu istiqamətdə ölkə başçısının rəhbərliyi ilə qısa müddət ərzində genişmiqyaslı və uğurlu işlər həyata keçirilmişdir. 

Məhz qeyd olunan istiqamətlərdə həyata keçirilən təşəbbüslərə dəstək vermək məqsədilə Azərbaycan Respublikasının Prezidentinin 2021-ci il 4 yanvar tarixli Fərmanı ilə Qarabağ Dirçəliş Fondu təsis edilmişdir. Fond azad edilmiş ərazilərdə bərpa və yenidənqurma prosesinə töhfə verməklə yanaşı, vətəndaş cəmiyyətinin bu prosesdə fəal iştirakını təşviq edir, eyni zamanda tarixi və mədəni irsin dirçəldilməsi, ekoloji tarazlığın qorunması, sosial-humanitar və təhsil sahələrində layihələrin reallaşdırılması istiqamətində də ardıcıl və sistemli fəaliyyət göstərir. 

Fond, 2021-ci ildən etibarən təşkil olunan “Rebuild Karabakh” sərgisini geniş ictimaiyyətin bərpa prosesinə cəlb olunması, tərəfdaşlarla birgə təşəbbüslərin irəli sürülməsi və sosial, humanitar, mədəni və ekoloji sahələrdə əməkdaşlıq imkanlarının genişləndirilməsi baxımından mühüm platforma hesab edir. 

Əminəm ki, bu il də “Rebuild Karabakh 2025” sərgisi Qarabağın dayanıqlı inkişafı və müasir infrastrukturunun qurulması baxımından tərəfdaşlar arasında faydalı fikir mübadiləsi və əməkdaşlıq üçün məhsuldar bir məkana çevriləcək. 

Sərginin bütün iştirakçılarına uğurlar və doğma Qarabağın bərpası və dirçəlişi naminə faydalı əməkdaşlıqlar arzulayıram. 

Hörmətlə, 
Rəhman Hacıyev 
Qarabağ Dirçəliş Fondunun İdarə Heyətinin sədri