Dizayn və Memarlıq Layihələndirməsinin Perspektivləri
21 oktyabr 2024
0000
Farida Qasımova, Azərbaycan Memarlıq və İnşaat Universitetinin professoru
Mən daim beynəlxalq sərgilərdə iştirak edirəm, həm Azərbaycanda, həm də onun hüdudlarından kənarda. İtaliyada və Fransada olmaq imkanım olub. Bu tədbirlərin miqyasını, əhatəsini və məlumatlılığını yaxından bilirəm. Buna görə də Bakı İnşaat Həftəsində bir çox ölkədən şirkətlərin və ziyarətçilərin iştirakını görmək sevindiricidir. Bu, yerli tikinti bazarının tələbata uyğun olduğunu və ölkəmizin qlobal trendlərdən geri qalmadığını göstərir.
Bakı Ekspo Mərkəzində keçirilən sərgidə məni ilk növbədə memarlıq və tikinti sahəsində təqdim olunan müasir texnologiyalar cəlb edir. Xüsusi maraq doğuran sahə isə müasir dizayn və memarlıq layihələndirilməsində tətbiq olunan ağıllı texnologiyalardır.
Xüsusilə vurğulamaq istədiyim sahələrdən biri də tikinti və təmir materiallarıdır, həmçinin ikinci Qarabağ müharibəsi zamanı azad edilmiş ərazilərin bərpası ilə bağlı müasir dizayn və memarlıq layihələrinin nümayiş olunduğu ekspozisiyadır. Bu mövzu mənim üçün çox önəmlidir, çünki müəllim olaraq gənc nəsilə ən müasir tendensiyaları çatdırmalıyam. "Rebuild Karabakh" sərgisi məni xüsusilə cəlb etdi. Bu regionda həyata keçirilən iri miqyaslı layihələr, Qarabağ bölgəsində hər cür obyektin layihələndirilməsində nə qədər müasir trendlər və yanaşmaların istifadə olunduğunu nümayiş etdirir. Burada möhtəşəm məkan həlləri, maraqlı memarlıq və kompozisiya üsulları və s. müşahidə etmək mümkündür. Xüsusilə park tikintisi ilə bağlı olan ekspozisiyanı qeyd etmək istərdim.
Bundan əlavə, "Rebuild Karabakh" sərgisində inklüzivliyə böyük diqqət ayrılması məni sevindirdi. Müharibə nəticəsində fiziki məhdudiyyətləri olan insanlar qalıb, onlara rahat hərəkət etmə şəraiti lazımdır. Bu həm də yaşlı insanlar və fiziki məhdudiyyətli uşaqlar üçün keçərlidir.
Sərgi, regionda yaradılan məkanın hər kəs üçün uyğunlaşdırıldığını anlamağa imkan verir.
AZ
EN
RU
